ISSN (Print) - 0012-9976 | ISSN (Online) - 2349-8846

ఎన్నికల తరవాత పుంజుకున్న స్టాక్ మార్కెట్

.

The translations of EPW Editorials have been made possible by a generous grant from the H T Parekh Foundation, Mumbai. The translations of English-language Editorials into other languages spoken in India is an attempt to engage with a wider, more diverse audience. In case of any discrepancy in the translation, the English-language original will prevail.

 

మే 20వ తేదీన ఎగ్జిట్ పోల్స్ ఫలితాలు వెలువడిన వెంటనే స్టాక్ మార్కెట్ ఎంతో కాలంగా అత్రుతతో ఎదురు చూస్తున్న 40,000 పాయింట్ల పరిధి దాటింది. అంతర్జాతీయంగా ఆర్థిక వ్యవస్థ, వాణిజ్యం పరిస్థితి అంత బాగా లేనప్పటికీ మన దేశంలో స్టాక్ మార్కెట్లు పుంజుకోవడం ఆశ్చర్యమే. అయితే జూన్ ఆరవ తేదీన రిజర్వూ బ్యాంకు వడ్డీ రేట్లు తగ్గించిన తరవాత సెన్సెక్స్ 400 పాయింట్లు పడిపోయింది.

మార్కెట్లలో పతనం కనిపించినప్పటికీ జాతీయ ప్రజాస్వామ్య కూటమి, యు.పి.ఎ. 2 సమయంలో ప్రకటించిన ఆర్థిక విధానాలద్వారా కూడా మార్కెట్ లో ఇంత అనూహ్యమైన పెరుగుదల కనిపించలేదు. ఎగ్జిట్ పోల్స్ మార్కెట్ పెరుగుదలకు కారణమయ్యాయి. ఇలా ఎందుకు జరిగింది? స్టాక్ మార్కెట్ల ఎదుగుదల, పతనం రెండు అంశాల మీద ఆధారపడి ఉంటాయి. ఒకటి స్టాక్ మార్కెట్లో వాటాలు అమ్మే కార్పొరేట్ సంస్థల మౌలిక అంశాలు పటిష్ఠంగా ఉండడం. రెండవది అనూహ్యమైన పరిణామాలు జరగడం. ఈ పరిణామాన్ని ప్రసిద్ధ ఆర్థిక శాస్త్రవేత్త కీన్స్ సిద్ధాంతాల ప్రకారం పరిశీలించాలి. ఇందులో ఆర్థిక పరిస్థితి బాగుంటుందన్న ఊహాత్మక భావన వల్ల స్వల్ప కాలిక లాభాలు సమకూరడం మార్కెట్ పెరుగుదలకు కారణమా లేక కార్పొరేట్ సంస్థల మౌలిక అంశాలు పటిష్ఠంగా ఉండడం కారణమా అని బేరీజు వేసి చూడాలి. మొదటిదే నిజమైతే మార్కెట్ల గురించి అంచనాలు విపరీతంగా ఉన్నాయని, వీటిని సరిదిద్దవలసిన అవసరం ఉందని అర్థం. రెండవ అంశమే కారణమైతే ప్రస్తుత లాభాల రేటు అధికంగా ఉన్నందువల్ల మార్కెట్లు పెరిగి ఉండవచ్చు. భవిష్యత్తులో ఆర్థిక వ్యవస్థ మెరుగ్గా ఉంటుందన్న అంచనాలు సైతం కారణం కావచ్చు. అంటే ఇందులో తాలేదో మేలేదో తేల్చడం కష్టమే. ప్రస్తుతం తాలు అనిపిస్తున్నది మితిమీరిన అంచనాలవల్ల కావచ్చు. అది తరవాత నిజమైనా కావచ్చు. కానీ కొద్ది వారాలుగా మార్కెట్లు పెరగడానికి అసలు కారణం ఏమిటి?

మొదటిది, ఒక్క రోజులోనే స్టాక్ మార్కెట్లో విపరీతమైన పెరుగుదల కనిపించడానికి నరేంద్ర మోదీ నాయకత్వంలోని ప్రభుత్వం మళ్లీ విజయం సాధించబోతోందని ఎగ్జిట్ పోల్స్ లో అంచనా వేయడం కావచ్చు. రెండవది, మొదటి అంచనాతో సంబంధం ఉన్నదైనప్పటికీ మార్కెట్లలో పెట్టుబడి పెట్టే వారు ప్రభుత్వానికి మంచి మెజారిటీ వస్తుందని అనుకున్నందువల్ల మార్కెట్లలో పెట్టుబడి పెట్టి ఉండవచ్చు. పరిస్థితి వ్యాపారానికి అనువుగా ఉందని భావించి ఉండవచ్చు. అయితే ఈ ఆశాభావం మాత్రమే సరిపోదు. ఎందుకంటే ఈ ప్రభుత్వం మొదటి దఫా ఆర్థిక వ్యవస్థలో అనుకున్న ఫలితాలు ఏవీ సాధించలేదు. సమర్థత కనబరచని ప్రభుత్వం మీద నమ్మకం ఉంచి పెట్టుబడులు పెట్టే అవకాశం లేదు. మరి ఎందుకు పెట్టుబడి పెట్టారు? ప్రధానమంత్రి మోదీ బలమైన నాయకుడు కనక ఆయన నిర్ణయాత్మకమైన, మార్కెట్ కు అనుకూలమైన  చర్యలు తీసుకోగలరన్న విశ్వాసం ఉండి ఉండవచ్చు. రాజకీయంగా కష్ట సాధ్యమే అయినా మార్కెట్ కు అనుకూలమైన ఆర్థిక సంస్కరణలు చేపడ్తారన్న ఆశాభావం కావచ్చు. ప్రభుత్వ రంగంలోని భారీ సంస్థల నుంచి ప్రభుత్వం తన పెట్టుబడులను ఉపసం హరించుకుంటుందని, రెండవ సారి అధికారంలోకి వస్తే మోదీ ఈ పని చేయగలరని ఆశించి ఉండవచ్చు. కార్పొరేట్ సంస్థలు మోదీ నుంచి ఆశించింది ఇదే. ఇలాంటి ఆశలు ఉన్నప్పటికీ మోదీ గతంలో పెద్ద నోట్ల రద్దు లాంటి విపరీతమైన నిర్ణయాలు తీసుకున్నారన్నా వాస్తవాన్ని కూడా గమనించాలి.

మూడవది, అంతర్జాతీయ ద్రవ్య నిధి సంస్థ (ఐ.ఎం.ఎఫ్.) భారత్ అత్యంత వేగంగా అభివృద్ధి చెందుతున్న ఆర్థిక వ్యవస్థ అని అంచనా వేసింది. ఈ అంశం కూడా స్టాక్ మార్కెట్లు పురోగమించడానికి కారణం కావచ్చు. ఇది నిజానికి ఆశ్చర్యకరమైందే. ఎందుకంటే గత త్రైమాసికంలో భారత ఆర్థిక వ్యవస్థ అంత మెరుగ్గా ఏమీ లేదు. కాని పెట్టుబడి పెట్టే వారు గత అనుభవం సానుకూలంగా లేకపోయినా భవిష్యత్తు ఉజ్వలంగా ఉంటుందనుకుని అనుకుని ఉండవచ్చు. చమురు ధరలు తక్కువే ఉన్నాయి కనక ద్రవ్య విధానం సానుకూలంగా ఉంటుందన్న ఆశాభావం ఉండి ఉండవచ్చు. సాధారణ పరిస్థితుల్లో కంపెనీల వాటాలపై అంత లాభం రాకపోయినా వాటాలు కొనడం ఆకర్షణీయంగా ఉండవచ్చు. వడ్డీ రేట్లు తగ్గితే కార్పొరేట్లు, కుటుంబాల పెట్టుబడి పెరుగుతుందని, తద్వారా ఆర్థిక వ్యవస్థ మెరుగవుతుందని భావించడానికి అవకాశం ఉంది. కానీ రిజర్వూ బ్యాంకు సంకేతాలు కలగాపులగంగా ఉన్నాయి. వడ్డీ రేట్లు తగ్గించినప్పటికీ ముందు అనుకున్న అభివృద్ధి రేటును కూడా తగ్గించింది. బ్యాంకింగేతర ఆర్థిక సంస్థల వద్ద నగదు లేని సమస్యను చక్క దిద్దడానికి రిజర్వూ బ్యాంకు ఎలాంటి చర్యా తీసుకోలేదు.

నాల్గవది 2019లో స్టాక్ మార్కెట్లో విదేశీ పెట్టుబడులు అధికంగానే సమకూరాయి. ఈ పెట్టుబడులు సమకూరడానికి ఇతరేతర కారణాలు కూడా ఉన్నాయి. చైనాకు, అమెరికాకు మధ్య వాణిజ్య యుద్ధం జరుగుతోంది. అమెరికాలో ద్రవ్య విధానం మెరుగుపడుతుందన్న అంచనా నిజం కాలేదు.

మార్కెట్ రేట్లలో పెరుగుదల సరైందైనా కాకపోయినా ఒక విషయం మాత్రం స్పష్టం. ఎగ్జిట్ పోల్స్ తర్వాత స్వల్పకాలికంగా స్టాక్ మార్కెట్లో కనిపించిన ఒడిదుడుకులు చాలా వరకు తాలే. అదీగాక మన స్టాక్ మార్కెట్ మీద విపరీతమైన అంచనాలు ఉన్నాయి. ఇది ఏ ఆర్థిక వ్యవస్థకైనా వినాశకరమే. అంతర్జాతీయ వాతావరణం గందరగోళంగా ఉన్నప్పుడు ఈ ప్రమాదం మరింత ఎక్కువగా ఉంటుంది. మార్కెట్ పై విపరీతమైన అంచనాలు ఉన్నప్పుడు స్వల్ప కాలికంగా ఆస్తుల మీద వచ్చే లాభాలపై పన్ను విధించాలని కీన్స్ ఆర్థిక సిద్ధాంతాలను అనుసరించే వారు అంటుంటారు. అదే సమయంలో స్టాక్ మార్కెట్లను నిరుత్సాహపరచకూడదు. ఎందుకంటే విభజించడానికి వీలు లేని పెట్టుబడిని విభజించడం సాధ్యం అవుతుంది. తద్వారా పెట్టుబడులకు ముప్పు తగ్గుతుంది. ప్రభుత్వం ఆర్థిక వ్యవస్థ కళ్లాలను తన చేతిలోనే ఉంచుకోవాలి. వడ్డీ రేట్లలో మార్పుల ద్వారా కార్పొరేట్ సంస్థల, కుటుంబాల పెట్టుబడులను ప్రభావితం చేసే ప్రయత్నం చేయకూడదు. దురదృష్టం ఏమిటంటే ప్రస్తుత ప్రభుత్వం ఆర్థిక పరిస్థితి గడ్డుగా ఉన్న సమయంలోనూ ప్రభుత్వ కోశ బాధ్యత, బడ్జెట్ నిర్వహణ చట్టం మీదే ఆధారపడుతోంది. దీనివల్ల విధాన నిర్ణయాలు తీసుకునే అవకాశం తగ్గుతుంది. దాని వల్ల ఆర్థిక వ్యవస్థ స్టాక్ మార్కెట్లకు లోబడి పని చేయవలసి వస్తుంది. కార్పొరేట్ సంస్థలు నిర్ణయాలు తీసుకోవడానికి అవకాశం తగ్గుతుంది. ఆ సంస్థల నిర్ణయాలు ఆర్థిక వ్యవస్థ అదృష్టం, దురదృష్టం మీద ఆధారపడి ఉండకూడదు.

Back to Top